Pakistan-in military leh intellingence lama US nena thawhdunna titawp

Pakistan Defence Minister Khurram Dastgir Khan chuan firfiakte beihletna kawnga US nena hun rei tak an lo thawh dun tawhna chu an titawp niin a sawi.

Pakistan chanchinbu, Dawn chuan hemi chungchang hi chhuahin, minister hian firfiak beihletna kawngah Pakistan thawhpui aiin mawhchhiat leh sawisel a uar ta zawk niin a sawi. Pakistan chuan a inpekna te hi hriatsak ve a duh a ni, a ti.

Minister chuan Afghanistan-ah US chu hnehin a awm chho mek a, hei vang hian firfiak beihnaa a hlawhchhamnaah Pakistan chu mawhpuh a tum a ni, a ti. Ram pahnihte hi Afghanistan-a firfiakte beihletnaa an lo thawkdun reng tawh a ni.

US embassy chuan thawhdunna tihtawp a nih chungchangah hi engmah a la sawilang ve lo a, mahse tunhnaiah ram pahnihte inkar boruak hi a ṭha lo chho hle a ni. US chuan security lama Pakistan a puihna sum tam tham tak pawh a lo titawp tawh bawk a ni.

Pakistan Foreign Minister Khwaja Asif chuan US nena a inkar boruak a chhiat chhoh zel avangin Chian leh Russia nena inzawmna ṭha zawk neih dan tur an ngaihtuah dawn tih a lo sawi tawh bawk.