US-in Pakistan chhawm-dawlna titawp loin dan hrih a nih tih a sawi

United States (US) chuan Pakistan sipaite chhawmdawlna a pek ṭhin chu a titawp lo a, a dang hrih niin a sawi. Pakistan chuan thil dik tak ti a, firfiakte beihlet kawnga a tihdangphung a thlak a beisei thu a sawi.

Under Secretary of State for Public Diplomacy and Public Affairs Steven Goldstein chuan Washington-a chanchin thar lakhawmtute a kawmnaah he thu hi a sawi a ni. Goldstein chuan Pakistan nena military leh intelligence lama thawhdunna tihtawp lailawk an tum chung­changah Pakistan lam aṭangin eng thu mah an la dawng lo niin a sawi. Mahse Pakistan chuan a laka an beisei anga a rama firfiakte bei tura a kalphung a thlak danglam ngei an beisei tlat tih a sawi nghal bawk.

Pakistan chuan US nena firfiak beihletna kawnga an thawhdunna-te ngai pawimawh a, tihlawhtling tura tha a thawh a ngai a ni tiin, a tuartu ber chu Pakistan mipuite an nih avangin sorkar chuan a ram mipuite a ngaih pawimawh a ngai a ni, a ti.

Pentagon pawhin news confe­rence a neihnaah a ram chhunga firfiakte do let turin Pakistan chuan theina a nei a ni, a ti. Pentagon thupuangtu Dana White chuan Pakistan tan chuan firfiakte bei let a duh takzet a nih chuan tun hi lantirna hun remchang tak a ni tih a sawi a, hemi kawngah hian thawhpui pawh an chak hle a ni, a ti.

Hetih lai hian US Secretary of State Rex Tillerson chuan Pakistan ramah sakhaw zalenna palzutna nasa tak a thlen fo avangin Pakistan chu 'special watch list' ramah a telh a ni.