Tun karah US mipui mtd 160 hnenah vaccine pek hman kan tum : Biden

US President Joe Biden chuan Thawhlehni khan tun kar chhung ngeiin an ram mipui maktaduai 160 hnenah Covid vaccine pek hman vek an tum tih puangin, an ram chu hripui leng lakah a fihlim thuai dawn tih a sawi.

President Biden chuan kumin January thla aṭang khan Covid-19 kai leh thihpui chu 90% in an tlahniam tawh a, America mi vaccine dose kima la tawh te chu coronavirus hri len hma ang khan nun pangngaiin an khawsa leh thei tawh tih a sawi a ni.

Biden chuan, "Vawiina Covid-19 team-te nena inkawm­hona kan neih hnuah, hri leng do hneh tura theihtawpa kan beih hnuah ni 150 chhungin vaccine dose maktaduai 300 kan semchhuak thei dawn a ni. America mipui maktaduai 182 chuangin vaccine dose khatna hi la tawhin, kum upa zingah 90% in an la tawh a, kum 27 chung lam zingah 70% in an la tawh bawk a ni," a ti.

"Tun kar tawp hian American vaccine dose la kim tawh mak­taduai 160 chuang kan awm tawh dawn a ni. Kumin March thlaa ka sawi, July 4-a vaccine pek hman tum zat kan bituk chu ni tam a ral hmain kan tihlawhtling thei dawn a ni. Thla nga liamtaa office kan luah tirha vaccine la tawh maktaduai thum aṭang khan America mi vaccine dose la kim tawh maktaduai 160 kan nei thei dawn a ni," tiin Biden chuan Covid team te nena inkawmhona an neih hnuah a sawi.

US President chuan sum­dawnnate chu an inhawng leh ṭan tawh a, kum 40 hnua economy ṭhan nasat ber tura beisei a ni tih a sawi bawk. Hri leng do hna an thawh mek chu a la tawp lo tih a sawi nghal bawk a, mi tam tak vaccine la lo an awm avangin heng mite dinhmun hi a la derthawng thei tih a sawi.

"Delta variant vangin kan hri leng hi kan ngaihpawimawh a ṭul a ni," tiin ramchhung hmun ṭhenkhata hri kai zinga a zahve vel chu Delta variant kai an ni tih a sawi bawk. Delta variant hi hri dangte aia a hlauhawm mai bakah inkaichhawn a awlsam a, "Hei vang hian mitinte chu an inngaihtuah ṭhat leh ka ring. A bikin kum naupang lam vaccine lak ṭul ti kher lo, ngaihtuah buai ngai lo emaw tun thlenga lak tum lem lo te'n ngaihtuahna thar an neih a ngai," tiin Biden chuan a sawi.

President chuan hri leng lakah vaccine-te hian hna an thawk ṭha tawk tih sawiin, "American vaccine dose la kim tawh chu Delta variant pawh telin, hri lak aṭangin a venghim ṭha a ni. May thla tir aṭanga zirchianna thuk tak kan neih hnua a lan danin, US ram chhunga Covid-19 vanga damdawi-in panpui ngai leh thihpuite chu vaccine la lo te an ni," a ti.