Myanmar-ah hri lengin zual lam pan zel

Myanmar ramah sipai rorelna duh lohna avanga tualchhung buainaa thlen mek karah, Covid-19 hri lengin zual lam a pan zel bawk.

February 1-a sipaiten civil sorkar thuneih­na an hnehchhuh avanga nawrh huaihawtna chu health worker-ten an zawm avangin medical service lam pawhin a tuar hle.

Myanmar ram mipui maktaduai 54 zingah Covid vaccine dose kima la tawh chu 2.8% chiah an a la awm a, vaccine hi dose maktaduai 3.5 pek chhuah a ni tawh.

Hetih lai hian sipaite'n an hren mek, kum 76 mi civil sorkar hruaitu Aung San Suu Kyi chuan vaccine hi dose kimin a la tawh niin a lawyer chuan a sawi a, mahse a vaccine lak hming erawh a sawilang lo.

Kumin kumtir lam khan India aṭangin vacine dose maktaduai 1.5 leh China aṭangin dose nuai nga a lo dawng tawh a ni.

Thawhlehni khan Myanmar-ah hian hri kai thar 3,602 an awm a, hemi ni vek hian ramri bula, China ram chinah Ruili khuaah hri kai 15 hmuh chhuah an ni bawk a, heng mite hi Myanmar aṭanga an kai nia rin a ni. Hei vang hian Ruili khuaah hian lockdown puan nghal a ni.

Hri kai an pun chhoh zel avangin an ram khawpui, Nay Pyi Taw-ah chuan Thawh­ṭanni khan restaurant-a chawlh khap a ni a, khuahkhirhna dang pawh siam tum a ni bawk.