Portugal-a inpawngneknaah mi pariat thi

Protugal hmarlam, Vila Nova da Rainha khuaah Inrinni zan khan card tournament neihna hmunah kangmei chhuak vanga mipui inpawngneknaah mi pariat an thi.

Mayor Jose Antonio de Jesus chuan card tournament neihna hmun, in chhawng hniha sangah kangmei a chhuah vangin he tournament-a tel leh a entu mipuite chu chiaiin tlanchhuah an tumna lamah an innekbuai ta niin a sawi. Kangmei chhuah chhan hi hriat chian a ni lo a, media report ṭhenkhatah chuan heating boiler puah vang niin an sawi.

Mi pariat an thih bakah mi dang eng emaw zatin hliam an tuar bawk a ni.