Russia Parliament-in Danpui Siamṭhatna tur a pawm

Russia Parliament lower house, State Duma chuan an ram danpui siamṭhat rawtna a pawm. Danpui siamṭhat  hmang hian Vladimir Putin chuan kum 2024-a Russia President thlanna neih turah a chuh leh thei dawn a ni. 

Kum 67 mi, Putin hian Russia ram hian kum 20 lai chu president emaw, prime minister emaw dinhmun chelhin thuneihna a chang tawh a ni. Mahse danpui an  hman mekah danin a phal chin, a zawna President term hnih a chelhna leh, Russia President term li a chelhna chu  kum 2024 a tawp dawn a, a chuh chhunzawm thei dawn lo a ni. Mahse danpui siamṭhatna tur hi pawm a nih chuan a term lo chelh tawhte hi chhut tel a ni tawh dawn lo a, thlan tlin a nih chhunzawm zel chuan kum  2036 thleng thuneihna a chelh thei ang. 

State Duma-a ran danpui siamṭhatna tur chungchanga vote lakah, member 383 in a thlawp lamah vote-in, member 43 an hai thung. A duh lo lamah vote tla a awm lo a, vote lak ni hian member 24 an tel lo bawk. Parliament upper  house, Federa­tion Council-ah ngaihtuah a ni dawn a, hetah pawh hian awlsam taka an pawm rin a ni. Hemi hnu hian April 22-ah mipuite vote lak a ni ve leh ang. 

Danpui siamṭhat turah hian  President hnena higher court judge-te ban theihna leh, Parliament-in dan a pass tawh  hnawlsak theihna tur thuneihna pek belhna turte pawh a tel. Hetih lai hian eptu lam chuan danpui siamṭhat tum hi na takin an sawisel a, lungawi lohna an lantir tur thu an sawi. Mahse Russia sorkar chuan coronavirus leng mek avangin April 10 thleng chu mi 5,000 aia tam punkhawm khapna thupek a lo tichhuak tawh a ni.