Ram 114-ah Covid-19 darh tawh : WHO
World Health Organization (WHO) chuan Covid-19 hi khawvela ram 114-ah a darh tawh tih tarlangin, tunlai khawvela natna hri leng darh hnem ber a nih thu Nilaini khan a puang bawk.
Kumin January 30 khan WHO chuan Covid-19 avangin global health emergency a lo puang tawh bawk a ni. "He hri leng hi a darhna ram apiangah theihtawpa do rem tumin a theih ang angin hma kan la nghal zel a ni," tiin WHO Director-General Tedros Adhanom Ghebreyesus chuan a sawi.
US president Donald Trump chuan an ramah he hri hi a darh chhoh mek avangin, zanin aṭang hian Europe mite zin a khap a, mahse zin khap zingah hian Ireland leh UK an tel ve lo tih a sawi. Europe mite zin khap hun chhung hi ni 30 atana tih a ni. US-ah hian he hri kai hi mi 1,336 an awm tawh a, mi 38-in an thihpui tawh bawk.
He hri lo chhuahna China tih lohah chuan Covid-19 kai leh thi hi Italy-ah an tam ber a, mi 12,463-in an kai tawh a, chung zinga mi 827-te chuan he natna hri hi an thih pui tawh tih Worldometer chuan a tarlang.
John Hopkins University chuan he hri kai nuai chuang zinga mi 66,000 chuang enkawl dam ṭhat leh a nih thu a tarlang. WHO chuan he hri kai hi khawvel pumah mi 118,000 chuang an tlin tawh thu a tarlang a, heng zinga mi 4,291-te chuan an thihpui a ni.
China-in ramdangte a pui let
Covid-19 darh chhuahna hmun China chuan he hri do hneh a nih theih nan ram dangte chu pui letin, an medical team-te a tirchhuak.
China hian an ram tih loa he hri tuar nasa ber, Italy leh he hri darh zualna ram Iraq leh Iran-ah te medical team a tir lut tawh a ni. Association of Southeast Asian Nations (ASEAN) ram 10 te pawh a puih bakah, a ṭul angin ram dangte pawh puih chhoh zel a tum bawk a ni.
He hri darh chho mek dona kawnga hma lakna turin China chuan WHO hnenah US dollar maktaduai 20 a lo thawh tawh bawk.