Sri Lanka President-in hmeichhiate zu lei phalna pek duh lo

Sri Lanka sorkarin an ram hmeichhiate zu lei khapna dan hman mek siamṭhat a tum chu President Maithripala Sirisena chuan duh loin, a thuneihna hmangin dan siamṭhat tumna hi a hnawl.

Kum 1955-a Sri Lanka sorkarin dan a siamah, hmeichhiate chu anmahni in tur ngei pawh ni se zu an lei khapsak an ni a, hei bakah hian phalna nei loin bar-ah hmeichhiaten hna an thawh khap a ni bawk.

Sorkar hian zu lei thei chungchanga mipa leh hmeichhe inthliarna tihbona tura dan siamṭhat a tum bakah, an rama zu hralhchhuah theih hun chhung, zing dar 9 aṭanga zan dar 9 thleng ni ṭhin pawh zing dar 8 aṭanga zan dar 10 thlenga pawhsei a rawt bawk a ni.

President Sirisena chuan sorkarin zu chungchanga dan siamṭhat a tum chu chanchinbu aṭangin a hre ve chauh nia sawiin, he dan siamṭhat tumna hi sut leh nghal tura a hriattir thu a sawi.

Hetih lai hian sawiseltu lam chuan President chu mipa leh hmeichhiate intluktlanna ngai pawimawh tawk lohah an puh. Mahse President chuan hmeichhe zu lei khapna tihtawp tumna hi sawiseltu an tam a, hei hian Sri Lanka culture chhiatna thlenin, hmeichhe zu ngawl vei an tam phah hlauhthawnna a tam a, hei vang hian dan siamṭhat tumna pawh hi sut turin a ti niin a sawi.

Kum 2014-a World Health Organization data-a a landanin, Sri Lanka-a hmeichhei 80.5% te hian zu an in ngai lo a, mipa zu in ngai lo 56.9% an awm bawk. Kum 15 chunglamah hmeichhe 0.1% chuan zu an in nasa a, mipa zu in nasa hi 0.8% an awm thung. Sri Lanka hmeichhe tam berte chuan zu in chu an hnam culture nen inmil lo nia an ngaih vangin an duh lo a ni.