Turkey-in Syria-ah beihpui thlak dawn

Turkey President Recep Tayyip Erdogan chuan Syria ramri-a Syrian Kurdish hel, YPG lakah beihpui an thlak dawn tih a sawi.

President Erdogan chuan YPG-te thununna hnuaia awm mek, Afrin khuaah beihpui hi thlak an tum tih sawiin, kum 2016-a Islamic State (IS) firfiak pawl leh YPG laka beihpui an lo thlak tawhna, Euphrates Shield Operation chhunzawm zelna a nih tur thu a sawi. Euphrates Shield Operation hi thla riat zet an kalpui hnuin kum 2017 March thla khan an tawpsan chauh a ni.

Turkey sipaite chu helho kuta awm, Afrin khaw kiangah an inkulh tawh nia sawi a ni a, ni reilote hnuah beihpui hi thlak an tum a ni.

Hetih lai hian US chuan YPG hi IS firfiakte beihletna kawngah ṭangkai tak niin a ngai thung a, US President Donald Trump pawhin YPG fighter-te thuam chak hi a tum a ni. Nikum kum tawp lama Syria hmarlama IS firfiak kut aṭanga Raqqa khawpui lakletnaah khan YGP hi an ṭangkai hle a ni. Mahse Turkey chuan YPG hi dan pawna hnawl, Kurdistan Workers' Party (PKK) nena inzawmna an neih avangin firfiak pawlah a puang thung.