Jail tangte chhuah tum dan Taliban in duh lo

Afghanistan sorkarin Taliban firfiak jail tang an mante chhuah a tum danah Taliban-te chu lungawi loin, Afghanistan sorkar hmalakna hian US nena inremna an lo siam tawh chu a kalh tih Taliban thupuangtu Suhail Shaheen chuan a sawi.

Taliban firfiakte hian a tahtawla an mi leh sa, jail tangte Afghanistan sorkarin chhuah a tum chu an duh loh ber a ni a, mi tangte hi a ruala chhuah nghal vek an phut a ni. "Thil hriatchian duh kan neih chu, jail tang chhuah huna kan mi leh sa jail tangte hming kan ziahna leh an chhuah turte hming ziahna hi a inmil em, tih finfiah kan duhna chu min tih hlawhtlin sak kan phut a, heng kan thil phut hi an ti thei a nih chuan Afghanistan sorkar nena inbiakna neih zui kan hreh lo ang," tiin Shaheen chuan a sawi bawk. 

Afghanistan presi­dent Mohammad Ashraf Ghani chuan tangte chhuahna thupek hi nimin piah khan a tichhuak tawh a ni. President thupek siam angin Taliban firfiak an man mi 5,000-te chu a tahtawla chhuah tura tih an ni a, heng jail tang chhuah hmasak tura tih mi 1,500-te hi March 14 aṭanga chhuah ṭan tur an ni. Afghanistan sorkar leh Taliban inkar boruak hi a ṭhat chho zel chuan kar hnih danah jail tang dang mi 3,500 la awm aṭangin mi 500 chhuah zel tura tih a ni bawk.