US Congress-in President Trump thuneihna Khuahkhirh sakna tur a pawm
United States House of Representatives chuan Iran laka indo puang mai thei tura President Donald Trump thuneihna khuahkhirh sakna tur resolution chu Nilaini khan chu a pawm.
February 13 khan he resolution hi Senate-ah ngaihtuah a lo ni tawh a, a thlawp lamah vote 55 tlain, a duh lo lamah vote 45 a tla thung. President Trump-a party, Republican senator zinga pariatin Democrats lam resolution siam hi an thlawp pui a ni.
Congress-in resolution a pawm hi President Trump hnenah a pawmpui tura thawn a ni leh ang. Mahse Trump chuan a veto power hmanga lo hnawlsak a tum thu a sawi. President veto hi dan sak tur chuan House leh Senate-ah member hmun thuma ṭhena hmun hnihin an vote a ngai dawn a ni.
Resolution-ah hian Trump chuan Iran laka sipai chakna a hman dawn chuan Congress pawmpuina a la zel phawt tur tih a ni. He resolution hi January 3-a president Trump-a'n Iran Quds Force hotu, General Qassem Soleimani thahna tur thupek a tihchhuah nghawng zel avanga siam a ni. General Soleimani thah a nih vang hian Iran chuan Iraq-a US sipai hmunpui pahnih a bei zui a, hei vang hian US sipai 100 chuangin thluak lam harsatna an tawh phah.