PLO Central Council-in Israel ram pawmna tihtawp rawt

Palestinian Liberation Organization (PLO) Central Council chuan Israel ram a pawmna chu tihtawp a rawt.

Central Council meeting, ni hnih awh hi West Bank-a Ramallah khuaah neih a ni a, he hunah hian PLO leh Palestinian President Mahmoud Abbas-te chuan Israel-in Palestine state hran a pawmsak hma chuan Israel ram an pawmna chu tihtawp turin an rawt a ni.

Palestinian National Council speaker, Salim al-Za'noun chuan US President Donald Trump-an Israel khawpui atana Jerusalem a pawm thu a puan leh, Tel Aviv aṭanga Jerusalem-a US embassy sawn a tum thu a sawi chu an pawm loh thu a sawi bawk.

President Trump hian December 6 khan Israel khawpui atana Jerusalem a pawm thu hi a puang a, hei hian Palestinian leh Arab-te a tilungawi lo hle a, ram hrang hrangah Trump-a thutlukna siam duh lohna hi lantir a lo ni tawh a ni. Palestinian-te hian Palestinian ram hran a din hunah Jerusalem khawchhak lam, East Jerusalem chu khawpui atana hman an tum a, mahse Israel chuan Jerusalem khawpui pum chu hmasang aṭang tawha an ram khawpui, ṭhenhran theih loh niin a sawi thung.