President atana Putin duhtu pung zel

Russia President Vladimir Putin chu kumin an ram president thar thlanna neih turah pawh hneh taka a la tlin leh ngei rin a ni.

Russia sorkar hnuaia research centre VTSIOM in mipui ngaihdan a lak hnuhnung ber, Thawhṭannia a tihchhuahah Russia mipui zingah president atana Putin la duhtu hi 81.1% zet an la tling a ni.

Ngaihdan lakah hian Russia mipui 67% velin vote an thlak a, an zinga 81.1% chuan Putin an thlawp tur thu hi an sawi a ni. Russian Communist Party-in a thlawp, Pavel Grudinin chuan vote 7.6% hmuin, Liberal Democratic Party hruaitu Vladimir Zhirinovsky duhtu 4.2% an awm bawk.

TV presenter Ksenia Sobchak chuan 0.7% vote a hmu a, Yabloko party dintu Grigory Yavlinsky chuan thlawptu 0.6% neiin, Presidential Commissioner for Entrepreneurs` Rights Boris Titov chuan 0.3% a hmu a ni.

Survey hi January 8-10 chhung khan phone hmanga neih a ni a, kum 18 chunglamte ngaihdan lak a ni.