Venezuela-ah helicopter rutu pilot man tumin bei

Venezuela official-te chuan thla ruk liamtaa police officer hlui, police helicopter ru chhuaktu man tuma beihnaah mi eng emaw zat an thi niin an sawi.

Police officer hlu leh pilot, Oscar Perez hian nikum June thla khan a thurualpui ṭhenkhatte nen police helicopter ru chhuakin, an ram khawpui Caracas-a Supreme Court beih nan an hmang. Supreme Court hi grenade pali hmangin an bei a, a hnuah interior ministry office chu silaiin an kap zui bawk. Hemi hnu hian an bibo zui a ni.

Police-te chuan Perez man tum hian beihpui an thlak nghal a, Thawhṭannikhan Caracas khaw daiah police leh Perez-te hi an inkap a ni. Perez chuan a instagram account-ah police-te nena an inbeih lai video eng emaw dahlangin, amah pawhin thisen te kaiin silai a keng bawk a ni. Perez chuan police-te hian grenade launcher hmanga an kah thu leh, inpek an duh thu an sawi pawhin an awih duh lo a, police-te chuan tihhlum ngei an tum niin a sawi.

Mahse Interior ministry chuan police-te hian Perez-a leh a hote chu inpe tura an dawr laiin Perez-a te lam hian silai nen an bei niin a sawi thung. Inbeihna thlen hnu hian police-te chuan mi panga an man a, mahse Perez chungchang erawh engmah puanzar a ni lo.