Israel President thar atan Isaac Herzog lalut

Israel President atan Labour party hotu hlui, Isaac Herzog chu Nilaini khan rinawmna thu tiamtira lakluh a ni.

Knesset (parliament)-a lakluh a ni hmain Herzog chuan President kalchhuak Reuven Rivlin chu lawmthu hrilhna atan kuahin, hemi hnu hian kum sarih term, President ni tur hian lakluh a ni ta a ni.

Israel President atana lakluh anih hnuah thu a sawiah, Herzog chuan a chanvo pawimawh tak chu Israel society inpumkhatna siamṭhatna atan a hmang dawn tih a sawi. "Heta ṭang hian Israel presidential residence-ah lutin Israel society siamṭhat hna kan thawk ṭan dawn a ni. Kan danglamna te hi pumkhata min siamtu a nih theihnan hna kan thawk ang a, kan inkara khi chat awm chu zawmkhawmin zinkawng kan zawh dawn a ni," tiin kum 60 mi Herzog chuan a sawi.

Herzog hi kum 2003- khan Parliament member atan thlan a ni a, left-wing Labour party kaihruaiin ṭangrual sorkarah portfolio pawimawh tak tak a lo chelh tawh a ni. Tun hnaia a chanvo chelh pawimawh tak chu ram dang aṭanga pem lutte buaipuitu, Jewish Agency for Israel-ah hotu a ni.

Kum 2015 inthlanpuiah hian prime minister hlui Benjamin Netanyahu chu a hneh zo lo a, mahse kumin June thlaa prime minister thar Maftali Bennett kaihhruai ṭangrual sorkar thar din dawna Netanyahu paihthlak a nih hma lawk khan Parliament chuan President atana thlan a ni. Bennett kaihhruai sorkar lakluh a nih hma hian Israel ramah hia kum hnih chhungin inthlanpui vawi li an buatsaih hman a ni.

Herzog hi Israeli President hlui leh an ram tana United Nations ambassador lo ni tawh bawk, Chaim Herzog-a fapa a ni.

Herzog hian Juda-te duh lohna leh thliarhranna, anti-semitism chu a bo theihna atana theihtawpa beih a tiam a, hei bakah hian Israel leh a ram ṭhenawmte'n inremna an neih theih nan hna a thawh dawn thu leh, Israel ram himna tiderthawng thei, Iran nuclear programme pawh a do let zel tur thu a sawi.