South Africa President hlui police kutah a inpe

South Africa president hlui Jacob Zuma chu court thupek zah loha puh a nih avanga thla 15 tang tura hremna pek a nih hnuah, Nilaini khan police-te kutah a inpe.

Kum 2009-2018 chhunga South Africa President lo ni tawh, Jacob Zuma hi kar liam ta khan Constitutional Court chuan a chungthu hi a ngaihtuah a ni. Kum kua President a nih chhunga eirukna thleng nia sawi chhui meknaah evidence pe tura February thlaa court-in a lo hriattir tawh chu Zuma hian a zawm duh lo a, hei vang hian court thupek zah loha puhin hremna hi siamsak a ni.

Police-te chuan Zuma hi Nilaini zan thleng khan police station-ah a inpek hun an nghak dawn tih an sawi a, hemi chhunga a inpek loh chuan a chenna inah kalin an man dawn tih an sawi. Hei vang hian South Africa khawchhak lam, Nkandla-a Zuma chenna in chu amah thlawptu mi tam takin silai, chem leh fei nen an lo veng a ni. Mahse police-te hun tiam ral hma minute 40-ah Zuma hi a inpe ta a ni.

Jacob Zuma hi African National Congress hruai­tu hlun niin, mitinte dan hmaa an intluktlan vek theihna tura a beihna avangin South Africa-a mingote roreltute chuan manin jail-ah pawh a lo tang tawh a ni. Mahse President a nih hnuaah a kaihhruai sorkar hnuaiah eirukna lian tham tak tak a thleng nia puh a ni ta thung a ni. Kum 2018 khan eiruknaa inhnamhnawiha puh a nih avang leh, sorkar hnaah ṭhian leh chhungte duh sak a, dik lo taka thuna puh a nih bawk avangin President a nihna aṭangin a bang a, Cyril Ramaphosa chuan a thlak a ni.

Zuma hi deputy presi­dent a nih lai, 1999-a ralthuam leina tur USD tluklehdingawn 2 hu inremna siam chungchangah thil dik tawk lo a awm nia sawiin thubuai dang siamsak a ni bawk. Mahse Zuma chuan an puhna hrang hrangte hi thu dik lo niin a pha vek thung.