Japan sorkarin Tokyo-ah emergency puang dawn

Japan sorkar chuan coronavirus hri kai thar an pun chhoh zel avangin August 22 thleng Tokyo-ah state of emergency puan a tum tih minister pawimawh tak pakhat chuan Ningani khan a sawi.

Sorkar medical adviser-te chuan kar hnih hnua ṭan tur, Olympics chu hripui len chhung chu entu nei loa awm chu thil finthlak zawk a nih tur thu an sawi. Olympics-a tel tur infiammi leh official lo zin lutte chuan hri an tihdarh hlauhthawnna a lian hle.

Organizer-te chuan ramdang aṭangin infiammi ni lo, a entu tur luh an lo khap tawh a, an ram chhung aṭang pawhin stadium chhunga ṭhutna leng zat 50% emaw mi 10,000 thleng bak entu an awm thei dawn lo tih an sawi. Entu awm thei zat chungchanga thuthlukna vawiin hian sawihoin an puan rin a ni. Sawihona hi International Olympic Committee (IOC) president Thomas Bach-a'n a ho ang. Bach hian nimin khan Tokyo hi thlengin inbuatsaihna an kalpui dan te a endik leh dawn a ni.

Japan economy minister Yasutoshi Nishimura chuan July 12 aṭangin Tokyo-ah state of emergency an puang ṭan dawn tih a sawi. Nilaini khan hri kai thar 920 awm belh lehin, kumin May thla hnua ni khata hri kai hmuhchhuah tam ber ṭum a ni.

Olympic games hi July 23 - August 8 chhung neih a ni ang.