Haiti President a chenna inah thah a ni

Haiti president Jovenel Moise chu a mimal chen­na inah Thawh­­lehni zan khan mi tu tih hriat lohten luh­chilh­in an that.

Interim prime minister Claude Joseph chuan Nilaini khan President Mosie thah a nih thu hi sawiin, a nupui First Lady Martine Mosie pawh damdawi-inah dah luh a ni tih a sawi.

Haiti ram economic leh politics dinhmun hi tunhnai hian a ṭha lo hle a, tharum thawhna a hluarin a bikin an ram khawpui Port-au-Prince ah misual pawl (gang) pawikhawihna pawh a thleng fo a ni.

Kum 53 mi, Mosie hi an ram inthlanpui an neih theih loh avangin President atan ruat niin, kum hnih chuang ro a rel hman a ni.

Eptu lam chuan thu­neihna sang zawk inpek tumah an puh a, President atana ruat a nih chhung chu February thla khan a zo tawh nia sawiin bang turin an lo nawr fo tawh bawk a ni.