Russia-in NKorea tan Covid vaccine pek inhuam

Russia chuan North Korea tan Covid vaccine pek an inhuam thu a sawi leh.

North Korea hian hri leng vanga inkhuahkhirhna khirh tak a kalpui mek avangin mi tam takin ei leh in kawngah harsatna an tawk mek nia sawi a ni. Mahse NKorea sorkar hian a hmain ram eng emaw zatin vaccine leh chhawmdawlna pek an tum chu a lo hnar tawh a ni.

Ram dangte chhawmdawlna dawng duh loin, hri leng laka invenna atan ramrite a khar zawk a, hei hian China nena an insumdawnna thlengin a nghawng a ni. NKorea hian ei tur, fertilizer leh fuel lamah China hi innghahna atan a hmang a ni.

An ram hotu lu ber, Kim Jong-un pawhin an ramin ei leh in lamah dinhmun harsa tak an tawh mek thu hi thla hmasa khan a lo sawi tawh a, mipuite chu hun harsa zawk hmachhawn tura inbuatsaih turin a lo chah tawh bawk.

Russia foreign minister Sergey Lavrov chuan ṭum eng emaw zat chu NKorea hnenah hian Covid vaccine pek an inhuam thu an hrilh tawh tih sawiin,inkharkhipna khauh tak an kalpui chu mi zawng zawngin an tuar reng thei dawn lo a ni, a ti. Vaccine chauh ni lo, damdawi lam hmanraw dangte pawh pek an inhuam reng tih a sawi.