US-in Palestinian chhawmdawlna pek tur dang rih
US chuan UN relief agency kaltlanga Palestinian-te chhawmdawlna a pek tur, dollar maktaduai 65 chu ala pechhuak duh rih lo.
US chuan UN Relief and Works Agency (UNRWA) hnenah hian Palestinian-te chhawmdawlna tur dollar maktaduai 125 pek tur a nei a, mahse heng zinga dollar maktaduai 60 chauh pein, a bak dollar maktaduai 65 chu a la hreng rih dawn a ni.
President Donald Trump chuan US-in Palestinian leh Israel inkara remna leh muanna a awm theihna tura a hmalakna chu Palestinian-ten an hnawl a nih chuan chhawmdawlna a pek ṭhin chu tihtawpsakah a lo vau tawh a ni.
UN agency-a sum lut zinga 30% dawn hi US-in a thawh a ni a, nikum chhung khan UNRWA hnenah hian dollar maktaduai 370 zet a pe a ni.
Hetih lai hian Palestinian President Mahmoud Abbas chuan President Trump-an Middle East inremna siam tura a hmalak dan chu na takin a sawisel a, US-in Israel khawpui atana Jerusalem a pawm thu a puan avangin US ruahmanna siamte chu engmah an pawm dawn lo tih a sawi.
US State Department thupuangtu Heather Nauert chuan sum pek tur an dan rih chu inhremna lam a ni lo tih sawiin, US-in agency insiamṭhatna a duh vang zawk a ni, a ti. Dollar maktaduai 65 chu a hman dan tur ngaihtuah ṭhat duh vanga hreng rih an nih tih a sawi. Official chuan ram dangte pawh Middle East remna leh muanna a awm theina tura an inrawlh a, an tihturte an tih ve a hun tawh a ni, a ti.
UN humanitarian hotu hlui, Jan Egeland chuan US-in a sum a hren avanga sum lama an indaihlohna phuhruk a nih theh nan donor ram dangte chu hma la turin a ngen. He sum hi pekchhuah a nih loh chuan Middle East hmun hrang hrangah Palestinian refugee-ten harsatna lian tak an hmachhawn dawn a, a bikin agency chunga innghat naupang lehkha zir laiten an tuar nasa dawn a ni, a ti.