Catalan party-ten hruaitu atan Puigdemont duh

Spain aṭanga Catalan independence thlawptu party, Junts per Cat (JpC) leh Republican Left (ERC) chuan Catalan regional assembly hruaitu atan Catalan hruaitu hlui, ramdanga tlanchhe mek Carles Puigdemont chu candidate-a dah an remti.

Nikum December 21 khan Catalan regional inthlan hi neih ani a, he inthlanah hian assembly seat 135 awmah JpC leh ERC hian seat 66 an nei a, party pahnih thawkdunte hian assembly-ah seat hnih chauhin majority an pha lo a ni. Mahse independence thlawptu dang, CUP party in a thlawp dawn vangin majority hi a neih phak rin a ni.

Carles Puigdemont hian nikum October thla khan Spain aṭanga Catalonia bial independence a puan avangin Spain Prime Minister Mariano Rajoy chuan Spanish Constitution Article 155 hmangin Catalonia regional government hruaitu a nihna aṭangin a ban a ni. Hemi hnu hian Puigdemont hi Belgium-ah a tlanchhe nghal a, Spain-ah a kir leh chuan sorkar laka hel, sorkar thu zawm lo leh public fund dik lo taka hmanga puhna thubuaite siamsakin man nghal a ni dawn a ni.

Spain PM Rajoy chuan a kaihhruai sorkar chuan Puigdemont hi Catalan hruaitu dinhmun chelh tura a kir leh dawn anih chuan Article 155 chu a la hmang chhuznawm zel dawn tih a sawi. Catalan regional assembly-in hruaitu atana Puigdemont a thlang a nih chuan Spanish Constitutional Court-ah appeal a tum thu a sawi bawk.