Korea ram pahnihten flag pakhat hnuaia kal remti

North leh South Korea-te chuan thla thara Winter Olympics neih hunah an ram aiawh turte chu flag pakhat, 'unified Korea' flag hnuaia kalho tir an remti.

Korea ram pahnihte hian official-a inbiakna an neih hnuin, February thlaa South Korea-a Pyeongchang-a Winter Olympics neih turah NKorea-in a ram aiawhte tirh a remti a ni. Ruahman lawk ang chuan NKorea hian cheerleader 230, orchestral musician 140 leh taekwondo athlete 30 tirh a tum a ni. Ram pahnihte 'unified Korea' flag hnuai kal an remtih chu kum sawmsarih dawn an inkara inhriat thiam lohna awm tawh tihtawp an duhna lantirna a ngaih a ni. Ram pahnihte hian women's ice hockey team-ah joint team siam an remti bawk a, hei hi Korea ram pahniha athlete-te an ṭanho ṭum khatna tur a ni.

North Korea hian Winter Olympics zawh, March thla Paralympics neih turah pawh member 150 tirh a remti tawh bawk. Mahse North Korea hian registration tih hun tur a bawhpelh tawh avangin infiammi leh midang a tirh turte hi International Olympic Committee (IOC) in a pawmpui ve leh phawt a ngai dawn a ni. IOC hi Inrinni-ah an meeting dawn a ni.

Hetih lai hian Korea ram pahnihten hockey joint team siam an tum chungchang hi South Korea hockey coach leh chanchinbu ṭhenkhat chuan an sawisel a, SKorea-in medal a hmuh theihna hun remchang a tichhe dawn niin an sawi. Mi tam tak chuan online petition hmangin he ruahmanna siam titawp turin SKorea President Moon Jae-in chu an ngen. Mahse President hian Games-a North Korea tel tur chuan Korea ram pahnihte inlaichinna a tihṭhat phah tur thu a sawi thung.