US puihna loin Afghanistan a tluchhia ang : President Ghani

Afghanistan President Ashraf Ghani chuan US-in puihna leh sum hmanga a ṭanpuina tel lo chuan Afghanistan National Army chuan thla ruk bak a daih thei dawn lo a, Afghanistan sorkar pawh a tluchhe mai dawn niin a sawi.

Television show, CBS 60 Minutes-a interview a neihah Afghan President hian US sorkar kutah Afghanistan sorkar innghah dante a sawilang a ni. President Ghani chuan US puihna lo chuan an sipaite chu thla ruk bak an enkawl thei lo tih a sawi. US kuta an innghah lenna chhan chu sorkarin sum a ngah tawk loh vang tih a sawi tel bawk.

US hian Afghanistan defence budget-a 90% dawn hi a peksak a ni. Kum 16 chhung US leh a thurualpui ramten Afghanistan-a firfiakte lakah beihpui an thlaknaah American mi 2,400 in nunna an chan tawh a, dollar trillion khat zet sen a ni tawh bawk. Mahse firfiakten Afghanistan khawpui chu an la beih chhunzawm reng vangin indona hi a la tawp mai dawn lo nia sawi a ni.