Pope Francis-a'n Peru tlawh

South America ram pahnih tlawh tura zinchhuak, Roman Catholic kohhran hotu, Pope Francis chuan Ningani khan Peru a thleng a, mi tam takin an lo hmuak.

Pope Francis hi Peru President Pedro Pablo Kuczynski chuan Lima airport-ah alo hmuak a, kawtthlerah hian mipui tam takin an lo hmuak a ni. President Kuczynski hian an ram politics buaina chingfel tur hmalaknaah pui turin Pope hi a lo ngen tawh a ni.

Peru president hlui Alberto Fujimori chu human right palzut leh eiruknaa inhnamhnawiha puhna thubuaiah thiam loh chantir a kum 25 tang tura hrem mek a ni. Mahse President hlui hi a hriselna ṭhat tawk loh avangin nikum Krismas urlawk ni khan thuneitute chuan an ngaidam a ni. Hei hi duh loin Peru mipui tam tak chuan lungawi lohna an lantir zui bawk.

President Kuczynski chuan Fujimori ngaihdam chungchanga mipuite thinurna chu a hriatthiam thu a sawi a, hemi rual hian president hlui hi a hriselna a ṭhat tawk loh avangin lung-inah thi tura dah tir ngawt chu a remti thei bik lo niin a sawi. Fujimor hian BP hniam bakah lung ṭha lo a nei a ni.

Pope Francis hian Peru-a a cham chhung hian Puerto Maldonado leh Trujillo khua a tlawh dawn a, Pathianni hian Lima-ah Mass a buatsaih ang.