New Zealand PM a rai

New Zealand Prime Minister Jacinda Ardern chuan nimin khan nau a pai thu puangin, June thlaah naute a nei dawn. New Zealand PM zingah prime minister nih laia nau nei hmasa ber tur a ni.

Kum 37 mi, nikum October thlaa New Zealand PM atana lakluh, Jacinda Ardern-i chuan a kawppui, Clarke Gayford nena an fa hmasa ber tur an nei tur chu an hlim hle tih sawiin, PM leh nu nih a kawp dawn ta tih a sawi. Adern-i chuan nu ni chungin politics hna pawimawh tak a thawhkawp theih tur thu sawiin, a hma pawhin chhungkaw nu ni chunga rorelna hna pawimawh tak kengkawh thei tam tak an lo awm tawh a ni, a ti.

Ardern-i chuan nau a hrin hunah kar ruk chawlh a lak tur thu a sawi a, hemi chhung hian Deputy Prime Minister Winston Peters chuan a hna hi alo thawk dawn a ni. Mahse a chawlh chhung pawhin biak pawh reng theih a nih tur thu a sawi. Kar ruk hnuah a hna pangngai a thawh chhunzawm leh tur thu a sawi bawk.

Kum 1990 khan Pakistan Prime Minister hlui Benazir Bhutto-i chuan PM a nih laiin fa a lo hring tawh bawk a ni.