Seoul-ah khuahkhirhna khauh zawk hmang dawn

South Korea sorkar chuan Covid-19 kai thar an pun zel vangin karleh Thawhṭanni aṭang hian an ram khawpui, Seoul leh a chhehvel bialah khuahkhirhna khauh tak an siam dawn tih an sawi.

South Korea hian indus­trialised nation dangte aiin hri leng an tuar nep a, an ram mipui kum lama upa zawk te'n vaccine an lak ṭhat avangin damdawi-in panpui ngai emaw hri vang thi emaw an la tlem hle a ni. Hri kai aṭanga thi zat, mortality rate hi 1.23% chiah a la ni.

Mahse tun hnaiah hri kai hi an pung chho leh tan a, Ningani khan Covid-19 kai thar 1,316 an awm belhin Nilaini khan 1,275 an awm bawk.

Health official-te chuan July thla tawpah hri kai zat hi a leta an pun chhoh an ring a, hei vang hian hri darh tur invenna atan prime Minister Kim Boo-kyum chuan kar hnih chhung awh, full lockdown tih loha South Korea-a khuahkhirhna sang ber, level 4 scale an puang dawn tih sorkar meeting an neih hnuah a sawi.

Full lockdown puanin ram economy lamah nghawng a neih nasat ṭhin avangin, sorkar chuan economy nghawng lo thei turin ruahmanan hi a siam a ni. "Sorkar chuan lockdown puang kher lo a, ram ei bar nghawng lo thei ang ber turin an ruahman a ni. Khuahkhirhna siam danah Level 4 hi a khauh ber a ni," tiin Korean Society of Epidemiology president hlui Kim Dong-hyun chuan a sawi.

Khuahkhirhna thar berah hian mipuite chu mahni ina awm tam tura ngenin, school te chu remote learning hmanga kalpui a ni dawn a, zan dar 6 aṭanga zing dar 4 thleng mi pahnih chin bak awmkhawm phal a ni lo a,kawngzawhte a khap a ni.

Infiamna te chu entu awm loa kalpui tur a ni a, hotel-ah pawh a leng thei zat hmun thuma ṭhena hmun hnih chiah awm phal a ni. Movie leh concert-te chu zan dar 10 hnu lama khar tura tih an ni. Nightclub leh bar te chu hawn an la phal lo a, restaurant leh cafe te chu mihring leng zat bithliah tur leh zan dar 10 hnua inkhar tura tih an ni.

South Korea-ah hian Covid-19 kai hmuhchhuah 1,65,344 an awm tawh a, mi 2,036 an thi tawh a ni. Hetihlai hian an rama cheng mi maktaduai 52 zinga 10% chiahin Covid vaccine dose kimin an la la a, 30% te chuan dose khatna la tawh bawkin, vaccine la zinga a tam zawk chu kum 60 chunglam te an ni. September thla hmain puitling 70% chin vaccine dose khatna tal pek hman a tum.

Khuahkhirhna thar hi karleh Thawhṭanni aṭanga hman ṭan tur ni mah se, PM Kim chuan nimin aṭang khan chhungkua/mimala inhmuhkhawmna te chu huaihawt rih lo turin a ngen.