Scientist-ten UK-a khuahkhirhna tihtawp tum la hlauthawng

Scientist 100 chuangte chuan Ningani khan thuchhuah siamin, UK sorkarin July 19 aṭanga an rama Covid hri leng vanga khuahkhirhna a lo siam tawhte tihtawp vek a tum chu a la hlauhthawnawm hle tih an sawi.

Mi 122-ten UK sorkar hnena ngenna an siam hi 'The Lanchet' medical journal-ah tihchhuah a ni. Expert-te chuan khuahkhirhna siam zawng zawng tihtawp nghal chu a la hlauhawmin, tih dan tur a la ni lo, an ti. Covid hri chu a la bo mai dawn lo a, mi tam takin an la kai belh zel dawn niin an sawi bawk.

"UK sorkar chuan a thil tum hi ngaihtuah ṭha lehin, mipuite venhimna turin rang taka hma a lak a ngai a ni. July 19 aṭanga khuahkhirhna tihtawp vek a tum hi kaltlang pui lo turin an ngen a, hei hi thil hlauhawm tak a la ni," an ti.

UK prime minister Boris Johnson-a'n ruahmanna a lo siam tawhah chuan, July 19 aṭangin coronavirus vanga khuahkhirhna siamte chu tihtawp vek a ni tawh ang a, in lam aṭanga hnathawh pawh titawpin, inhlat deuha awma punkhawm pawh phal a ni dawn a, inchhunga face mask vuah kher a ngai tawh lo bawk ang. Johnson chuan hri kai thar leh thihpui zat an tlakhniam tawh avangin he ruahmanna hi siam a nih thu a sawi a, kar leh Thawhṭanniah sorkarin thutlukna a siam ang.

Mahse scientist-te chuan hri kai thar leh thihpui tlahniam mah se, hri leng mek hi chhut chah a la ni lo a, mi tam takin an la thihpuiin natna an la tawrh phah thei a ni tih an sawi. Sorkar chuan puitling chauh nilo, tleirawl zawkte pawh vaccine pek kim an nih hma chuan khuahkhirhna hi titawp vek lo se an duh tih an sawi.