Turkey-in Syria ramri-ah beihpui thlak

Turkey indo thlawhtheihna te chuan Syria ramri, Afrin biala Kurdish fighter-te lakah beihpui a thlak ṭan ta.

Turkey hian firfiak pawla a puan, YPG-te chu chhim lama Syria nena an inri bul, Afrin bial aṭanga umchhuah vek a duh a ni. Heti lai hian US chuan Islamic State (IS) firfiakte laka beihpui a thlaknaah YPG hi a thawhpui avangin Turkey nen pawh an inkar boruak pawh a nghawng ngei rin a ni.

YPG chuan Turkey sipaite beihpui thlaknaah hian mi pakua an thi a, an zingah hian civil mi paruk an tel niin a sawi.

Russia chuan Afrin biala thil thlengah hian a inrawlh dawn lo tih sawiin, a sipaite pawh a sawn a ni. Syria chuan Turkey chetdan chu a dem thu sawiin, a ram thuneihna zah lohnaah a puh.

Hetih lai hian Turkey Foreign Minister Mevlut Cavusoglu chuan beihpui an thlak hma hian hriattirna an pe vek a, Syria sorkar pawh an hriattir lawk niin a sawi. Mahse Syria chuan he hi a pha thung.

Turkey chuan beihpui thlaknaah hian Kurdish firfiakte hmun 108 an kap niin a sawi a, Turkey thlawptu helpawl, Free Syrian Army pawh Afrin bialah hian an lut ve nghal nia sawi a ni bawk. Turkey Prime Miniter Binali Yildirim chuan boruak aṭanga beihpui thlak a nih hnuah, khawmual sipaite pawh tirh an ni dawn tih a sawi.