United State VP-in Mideast tour nei ṭan

US Vice President Mike Pence chu Middle East ram tlawh kual turin a zin chhuak a, Inrinni khan Egypt khawpui Cairo a thleng. Egypt bakah Jordan leh Israel-te a tlawh bawk ang.

US President Donald Trump-a'n nikum December thlaa Israel khawpui atana Jerusalem a pawm thu a puan hnuah US senior official-in Middle East a tlawhna hmasa ber a ni. President Trump-a thupuan vang hian Middle East ram hrang hrangte chuan sawiselin, lungawi lohna pawh an lo lantir fo tawh a ni. Middle East leh khawvel ram dangten an sawisel leh an dodal chungin, President Trump chuan Tel Aviv-a US embassy pawh Jerusalem-ah sawn a la nih tur thu a sawi bawk.

Vice President Mike Pence hian thla hmasa khan Middle East hi tlawh a tum a, mahse Trump-a thupuan vang hian a tihtlai phah ta a ni. Egypt-ah hian an ram president Abdel-Fatah al-Sisi nen inkawmin, hmasawnna hna kalpui dan turte an sawidun a ni. Hei bakah hian Sinai Peninsula-a firfiakte chet dan te, US-in Egypt tana chhawmdawlna a pek chungchangte pawh an sawidun bawk. Pence hi a nupui Karen-in a ṭawiawm a ni.