Turkey sipaiten Afrin khua an lut

Turkey khawmual sipai­te chuan Syria-a Afrin bialah Kurdish firfiak, Peoples' Protection Units (YPG) lakah beihpui an thlak a, Pathianni khan sipaite hian Afrin khua hi an luhchilh tawh a ni.

Turkey sipaite hian kar kaltla Inrinni aṭang khan indo thlawhtheihna hmang­in beihpui a thlak ṭan a, Pathianni aṭang khan khaw­mual sipaite hmangin a beih chhunzawm a ni. Turkey President Recep Tayyip Erdogan chuan US-in a thlawp, YPG-te beihna hi an zo thuai dawn niin a sawi. Turkey hian YPG laka a beihpui thlak hi 'Operation Olive Branch' tiin a vuah.

YPC hi danpawna hnawl, Kurdistan Workers' Party (PKK) nena in­zawmna an neih avangin Turkey chuan firfiak pawlah a puang a ni. YPG hi Syria ram hmarlam, Turkey ramriah an inzar pharh zel avangin Turkey chuan a ramri-ah harsatna siamin, ramri kaltlangin an ram a beih a hlauthawng a ni. Hei vang hian Syria hmarlam ramri, Afrin bial aṭanga umbo tumin beihpui a thlak ta a ni.

Turkey sipaite chuan Afrin biala beihpui an thlaknaah hian YGP bakah Islamic State (IS) firfiakte pawh an bitum nghal thu an sawi.