US-ah nawrh chhunzawm zel

Police kuta mi hang, George Floyd a thih avanga US khawpui hrang hranga lungawi lohna lantir chu chhunzawm zel a ni. 

Lungawi lohna lantirtute buaina chawk chhuak a, tharum thawhna te a thlen avangin mayor-te buaina punlun zel tur venna atan khawpui hrang hrangah curfew puang mah se, dan zawm loin an pungkhawmin kawng an zawh reng tho a ni. 

Nawrh huaihawtte hian chhun lamah boruak ṭha tak hnuaiah lungawi lohna lantir mah se, zan lamah erawh buaina siamin, thil tichhiaa an hal  bakah dawrte suasamin an rawk fo a ni.

US President chuan dan pawisa loa buaina chawk chhuak zawnga chete chu a dem thu sawiin, a ṭul a nih chuan dan kengkawh turin Natioal Guard emaw US sipaite erawh hman mai an nih tur thu pawh a sawi tawh bawk. 

George Floyd tihlumtua puh, police officer Derek Chauvin chu tualthah thubuai siamsak a ni tawh a, kut a thlak laia officer dang awm ve pathumte chu ban an ni tawh bawk a, thubuai erawh siamsak an la ni lo.