South Korea-in Covid-19 do nan supplementary budget duang

South Korea chuan Covid-19 hri leng vanga ram economy tlachhe tur ven nan, won 35.3 trillion (US dollar tluk­lehdingawn 28.5) chu supplementary budget a siam tih an Ministry of Economy and Finance chuan a tarlang.

He budget tam tham tak pawmpui tur hian National Assembly nghah mek a ni tih Ministry of Economy and Finance chuan a tarlang bawk. National Assem­bly hian a pawmpui a nih chuan South Korea-a supplementary budget tam ber tur a ni. Kum 2008-a global financial crisis a awm khan South Korea hian supplementary budget atan won 28.4 trillion (US dollar vbc 23 billion) chu a lo ruahman tawh a, hei hi Covid-19 donaa budget siam thar hian a khum hneh hle dawn a ni. 

Supplementary budget won 35.3 trillion zinga won 23.8 trillion chu 'government bond' kaltlanga pek chhuak tur a ni a, a dang won 11.5 trillion hi sorkar sum hman indaih lohna phuhrukna atana hman tum a ni. South Korea Economy and Finance minister Hong Nam-ki chuan an ram chhunga Covid-19 hri leng vangin mipuite an buai phah thu sawiin, investment lamah harsatna a thlen thute, sumdawnnaah nghawng a neih thu leh kawng hrang hranga an ram economy a khawihbuai thu a sawi. 

Heng harsatna thleng mekte hi sut kian a nih theih nan Hong Nam-ki chuan sorkarin Supplementary budget tam tham tak a ngaihtuah phah thu a sawi. Covid-19 hri len ṭan tirh khan South Korea hi China tih loah chuan he hri kai tam berna ram a ni a, April thla aṭanga khan hri leng hi an thunun theih ṭan a, tunah chuan an dinhmun hi a ziaawm chho tawh viau a ni.