US Congress-in temporary funding bill pass
US-a Republican leh Democrats roreltuten funding bill chungchanga inremna an siam theih loh avanga sorkar hna thawk thei loa an siam, shutdown hnuah Thawhṭanni tlai khan temporary funding bill an pass thei ta.
Thawhṭanni tlai khan temporary funding bill chungchang hi ngaihtuaha vote lak a ni. Republican lamin naupang an nih laia US-a pem lutte hmakhua tur chungchang sawiho an remtih hnuah, Democrats lam chuan bill hi an pawmpui ve thei ta a ni.
Senate-a vote laknaah mem-ber 81 in a thlawp lamah vote thlakin, a duh lo lamah vote 18 a tla. Hemi hma hian House of Representative-ah vote lak a ni bawk a, a thlawp lamah vote 266 tlain, member 150 in an thlawp lo thung.
US President Donald Trump-a kaihhruai sorkarin ram dang aṭanga an rama naupang an ni laia pem lutte thawn kir a tum chu Democrats lamin an duh lo a ni. US-ah hian kum an tlin hmaa pem lut awm nghet zui, mi nuai sarih vel an awm a, heng mite hi Dreamer tia sawi an ni.
President Trump chuan sorkar shutdown tihtawp a nih theihna tura Democrats lamin an ngaihtuahna an hmang thei chu lawmawm a tih thu a sawi a, US tana ṭha turin immigration chungchangah inremna daih rei tur zawk an siam tur thu a sawi.
Thawhṭannia temporary funding bill ngaihtuahnaah hian kum 2020 president thlanna neih tura Democratic candidate tura rinkai zinga mi–Elizabeth Warren, Kirsten Gillibrand, Cory Booker, Bernie Sanders leh Kamala Harris-te chuan bill dodal zawng hian vote an thlak thung.