Liberia President thar lalut

International soccer star hlui, George Weah chu Thawhṭanni khan Liberia President thar atan lakluh a ni.

Nikum December thlaa president thlanna neiha thlan tlin, George Weah lakluh inkhawm hi an ram khawpui, Monrovia-a stadium-ah neih a ni. President lakluh inkhawmah hian amah thlawptu mi tam tak bakah, an ṭhenawm ram president leh ramdang palai eng emaw zat an tel a ni.

George Weah hi Monrovia mirethei venga cheng ṭhin niin, Africa rama footballer ropui ber zingah a invawrh chhuak a ni. AC Milan le Paris St Germain-ahte a lo khel tawh a, kum 1995 khan world player of the year-ah thlan a ni. Amah ngaisangtute chuan 'King George' tiin an sawi ṭhin.

Kum 51 mi, President thar Weah chuan an ram inpumkhatna ṭha tak siam tura a beih tur thu leh, an ram aṭanga hlemhletna umbo tura a beih tur thu a sawi. Mi rethei leh hausate inkar zau lutuk tireh tur te, an ram hausakna sorkar official-te kuta a lut tur veng turte a thawh a tum thu a sawi.