Rohingya refugee camp-ah Covid-19 vanga thi awm
Bangladesh sorkar chuan Rohingya refugee camp-ah Covid-19 vangin mi pakhat a thi tih a nemnghet.
Hri vanga thi hi Cox's Bazar city-a Kutupalong Refugee Camp-a awm a ni.
Dr Mahbubur Rahman chuan Pathiannia thi kha a ni a, mahse a test result hi a tukah a chhuak chauh a, coronavirus vanga thi tih finfiah a ni ta a ni, a ti. Hri vanga thi nena inhnaivai mi dang pakuate chu isolation centre-ah dah nghal a ni bawk.
Bangladesh-ah hian Myanmar aṭanga raltlan mi maktaduai khat chuang an awm. Heng mite hi camp hrang hrangah awmin, Cox's Bazar-te camp siamah hian a tam zawk awmin an chep hle a ni.
March 11 khan refugee camp-ah Covid-19 kai hmuh chhuah a ni a, hei vang hian camp-te hi tlawhpawh theih loh tura khar nghal an ni. Camp chhunga hian hri kai hmuh tawh hi mi 29 vel an awm tawh.
US-based Human Rights Watch chuan Bangladesh-in Covid-19 vanga lockdown a kalpui dan chu sawiselin, mi tam tak ei leh in tur tlachhamin an awm niin a sawi.
"Rohingya refugee camp-a hri darh zel tur venna atan sorkarin hma a lak ngei chu ngai mah se, mipuite ei leh in tur an nghei lohna tura ruahmanna an siam erawh a ngai a ni," tiin HRW Asia director Brad Adams chuan a sawi.