Indonesia-in ram dangte puihna dil

Indonesia ramah Covid-19 hri leng a hluar chhoh zel avangin damlo enkawlna tur oxygen indaihlohna a thleng mek a, sorkar chuan ram dangte hnenah medical oxygen suppy turin a dil.

Kar liamta kartawp khan Singapore aṭangin oxygen cylinder leh concentrator 1,000 chuang bakah ventilator leh damdawi hmanraw dangte thawn luh a ni a, Australia pawhin ventilator 1,000 a thawn tawh bawk. Heng bakah Indonesia chuan a ṭhenawm, Singapore ram aṭangin oxygen ton 36,000 leh concentrator 10,000 lei a tum bawk a ni.

Indonesia minister, Luhut Binsar Pandjaitan chuan oxygen an mamawh phuhrukna tur hian China bakah oxygen pe thei tur ram dang pawh an be tawh tih sawiin, US leh United Arab Emirates pawhin puih an inhuam thu an hrilh tawh tih a sawi.

White House press secretary Jen Psaki chuan, "Hri kai an pun leh tak avanga Indonesia-in harsatna a tawh mek hi kan hriatthiampui a ni," tiin Covid vaccine-te an thawn dawn bakah, hrileng dona kawngah nasa zawka puih an tum thu a sawi.

Khawvela mihring tamna ram palina, Indonesia-ah hian hri kai hmuh chhuah tawh hi maktaduai 2.4 awm tawhin, an zinga 64,631 in he hri hi an thihpui tawh a ni. Hetih lai hian test neih ṭhat loh leh contact tracing neih ṭhat loh avangin hri kai zat pawh hi sorkarin a tarlan aiin an tam zawk hle rin a ni.

Khawpui hrang hrangah hospital-te an indaih lo hle a, khum chan loh vangin damlo tam tak chu in lamah a inenkawlte a ngai a ni. Java thliarkarah chuan June thla laihawl aṭang khan hospital lailawk siam a lo ni tawh.