Ethiopia ram inthlanpuiah PM Abiy party tling

Ethiopia ram inthlanpui neihah pime minister Abiy Ahmed-a kaihhruai Prosperity Party chu hneh taka thlan tlin leh an nih tih election board chuan Inrinni khan a puang.

PM Abiy chuan June 21-a inthlanpui neih chu hun rei tak chhunga an ram inthlan dik leh felfai ber a nih thu a sawi. Abiy-a party hian parliamentary seat 436 aṭangin seat 410 ah hnehna an chang a ni. Mahse inthlan hian eptu ṭhenkhatin an boycott a, Tigray biala tualchhung indona thleng te, chi bing inkar tharum thawhna thlengte chuan hmun ṭhenkhatah inthlan hi a hliahkhuh hle thung. Bial 10 zinga bial pathumah vote hi thlak a ni ve lo.

Opposition leader Berhanu Nega chuan tualchhung official leh sipaiten Amhara leh Southern Nations, Nationalities and Peoples huamchhunga observer-te an dahbelh avangin an party,Ethiopian Citizens for Social Justice party (Ezema) te chuan complaint 207 an thehlut tih a sawi.

June thlaa inthlanpui neih hi kum 2018-a ṭangrual sorkarin prime minister atana Abiy an thlanchhuah hnua Ethiopia ramin inthlanpui a hmachhawn lehna hmasa ber a ni. Office a luah hnu reilo teah Abiy chuan opposition party laka hremna te chu a hlip vek a, political prisoners sang chuang a chhuah tir mai bakah Africa rama sumdawnna huang zauh tura ke pen a tum tih a lo sawi tawh a ni.