Save the Children-in Afghanistan-a hnathawh titawp

Save the Children chuan Afghanistan-a an office chu Islamic State(IS) firfiakten luhkhunga an beih hnuin, Afghanistan-a an hnathawh chu an chawlhsan lailawk dawn tih a puang.

Nilaini khan Afghanistan khawchhak lam, Jalalabad khuaa Save the Children office chu firfiakte hian luhkhungin an bei a, thawktu pathum thatin midang paliin hliam an tuar bawk. Staff dangte erawh chu him taka chhanchhuah hman an nih thu Save the Children International chief executive Helle Thorning-Schmidt chuan a sawi.

Save the Children hotu chuan an office beih a nih leh, thawktute thah an ni chu an dem takzet tih a sawi a, he pawikhawina rapthlak tak thleng vang hian Afghanistan-a an hnathawh pawh tihtawp lailawk a ni, a ti. Hemi rual hian Afghanistan naupang retheite ṭanpui tur chuan an thawk zel dawn tih a sawi.

European Union pawhin Jalalabad khuaa pawikhawihna thleng chu a dem thu sawiin, international humanitarian law palzutna lian tak a ni, a ti.

Save the Children hian kum 1976 aṭang khan Afghanistan-ah hian naupang rethei leh dinhmun chhe zawkte ṭanpui hna a thawk ṭan a ni. Afghanistan hi kum 2016 khan aid worker-ten beih an tawhna nasatna ram zingah a tel tawh a ni. Nikum October thla khan International Committee of the Red Cross chuan an hnuaia thawk mi pasarih thah an nih avangin an staff dah pawh alo titlem tawh bawk.