Botox hman vangin camel 12 disqualify

Saudi Arabia-a kumtina neih ṭhin, camel beauty contest neih turah camel 12 chu a neituten an hmui leh hmel a lan nalhna tura Botox injection an hman avangin disqualify an ni.

Kumina camel beauty contest neih tura lawmman semchhuah tur hi dollar maktaduai 31.8 zet a tling. Camel beauty contest-a telte hi an san zawng, an thluk vum, beng leh hmui te endik a ni ṭhin. Damdawi hman khap a ni a, an hmui a lan nalhna atana damdawi chiu te, an hmul ziah leh rawng hnawih te, damdawi hmanga chei nalh te khap tlat a ni.

Ran doctor pakhat chuan camel 12-te chu Botox injection tihsakin, plastic surgery an tihsak tih a sawi hnuah thuneitute chuan an disqualify ta a ni. Show chief judge Fawzan al-Madi chuan camel chu Saudi Arabia chhinchhiahna pawimawh tak a ni a, humhalh zel an tum thu a sawi.

Camel beauty contest hi kum 2000 aṭang khan neih ṭan niin, Gulf-a festival lian ber a ni a, camel 30,000 vel an tel ṭhin.