Brazil president hlui ngenna hnawl

Brazil president hlui Luiz Inacio Lula da Silva-an eiruk thubuaia thiam loh chantir a nih chungchang ngaihtuah nawn tura a ngenna chu hnawlsak a ni.

Judge pathum awmna federal court panel chuan Lula ngenna hi ngaihtuahin, trial court in thiam loh a lo chantir tawhna chu a nemnghet zawk a, hei bakah hian kum kua leh a chanve tang tura hremna chu kum 12 leh thla khatah a tihsei sak zawk bawk.

Lula ngenna hi hnawlsak ni mah se court sang zawkah a la appeal leh thei a, mahse hei hian October thlaa president thlanna neih tura chuh a tum chungchangah nghawng a neih rin a ni. Workers' Party (PT) chuan Lula hi an party president candidate atan ruat a tum a, mahse Electoral Court chuan hei hi a pawm lo maithei nia sawi a ni.