Palestinian-te chhawmdawlna tihtawpah vau
Israel leh Palestinian inkara remna leh muanna a awm theihna tura inbiakna neihah Palestinian-te an tel duh lo a nih chuan chhawmdawlna an pek ṭhin tihtawpah US President Donald Trump chuan a vau.
US state deparment chuan President thusawi hi nemnghetin, economic leh security lama chhawmdawlna pek chungchang a sawi niin a tarlang.
Trump chuan Palestinian chu US zah lohah puhin, US tana engmah an tihsak duh loh laiin engvangin nge US chuan an tan a thawh zel bik ang tiin a sawi. Nikum December thlaa Trump-an Israel khawpuia Jerusalem a pawm thu a puan avang khan Palestinian-te an lungawi lo hle a, Israel-Palestinian inkara inremna kawng zawnga hmalaknaah US chu palai atana an pawm tawh loh thu an sawi a ni.
Remna zawnga inbiaknaa Palestinian aiawha lo tel tawh, Saeb Erekat chuan US President thusawi chu chhang letin, "Trump hian a pawisa hmangin thil tam tak a lei thei a ni mathei, mahse kan ram zahawmna erawh a lei thei ngai lo ang", a ti.
Davos, Switzerland-a World Economic Forum meeting-ah President Trump chuan US chuan Palestinian-te chu theihtawpa puiin, chhawmdawlna tur sum maktaduai za tel a pek ṭhin thu a sawi. Kar hmasaa US Vice President Mike Pence-an Middle East ram a tlawhkual ṭum khan Palestinian hruaitu chuan a lo hmu duh lo a, hei hi sawichhuakin Trump chuan Palestinian hruaitute thiltih dan chu inzahlohna lantirna a ni, a ti.
Palestinian-te ṭanpuina tur sum chu dawhkanah chhawpchhuahin a awm sa reng tawh a, mahse Palestinian lam hian remna kawng zawnga inbiakna dawhkan an kil duh loh chuan he pawisa hian an hnen a thleng dawn lo a ni tiin Trump chuan a sawi.