Turkey President-in military command centre tlawh

Turkey President Recep Tayyip Erdogan chuan an ram chhim lam, Hatay province-a military command centre chu Ningani khan a tlawh a, Turkey sipaiten Syria ramri bial, Afrin-a Kurdish firfiakte laka beihpui an thlak dante a enfiah nghal bawk.

Turkey sipaite hian Kurdish firfiak, YPG lakah beihpui an thlak mek a, an beihpui thlak hi "Operation Olive Branch" tiin an vuah a, ni ruk chhung Afrin bial hi an bei tawh a ni. President Erdogan chuan Turkey chuan midang ram laksak emaw, neihsak emaw tumna a neih loh thu saiwin, Afrin bial pawh firfiakte an nuai chimih hnuah a neitu dik tak hnenah an hlan mai dawn niin a sawi. Erdogan hi Turkey national defence minis­ter Nurettin Canikli, Chief of General Staff Hulusi Akar leh sipai hotu te'n an ṭawiawm a ni.