Trump-an mi mtd 1.8 hnenah citizenship pek tum

US President Donald Trump chuan document mumal nei lo chunga an rama pemlut zinga mi maktaduai 1.8 vel hnena US khua leh tui nihna, citizenship pekna tur ruahmanna a siam.

President Trump-a ruahmanna siam hi Mexico ram nena an inrina hungna bang siamna tura sum mamawh hmuhna atana a tih a ni. Ramri hungna bang siamna tur bill hi karleh khian pharh a tum a, he bill-ah hian ramri-a siamna tur hian dollar tluklehdingawn 25 mamawh a nih dawn thu tarlan ni.

Mexico ramri hungna siam tum dodaltu, Democrats lam chuan President ruahmanna siam thar hi an duh lo hle.

President Trump-a ruahmanna siam hnuaiah hian naupang an nih laia dan loa US-a lut, Dreamer tia sawi mi 700,000-te pawhin citizenship hi an dil thei dawn a ni. President hlui Barack Obama hunlai khan Dreamer-te an rama thawnkir an nih tur laka venna, Deferred Action for Childhood Arrivals (Daca) programme siam a ni a, mahse Trump chuan tun hnaiah Daca hi tihtawp a tum thu a sawi a ni. Dreamer-te bakah Trump-a scheme siam thar hi US-a pem lut, Daca-in a huam loh mi maktaduai 1.1 velin an dil thei dawn bawk a ni.