Thailand khawpuiah khuahkhirhna khauh zawk kalpui

Thailand chuan nimin aṭang khan an ram khawpui, Bangkok leh a chhehvelah coronavirus leng vangin khuahkhirhna dan khauh zawk a hmang leh a, mipui punkhawm leh teihawi khapin, thlawhtheihna leh bus firm-te chu chawlh lailawk tir an ni.

Thuneitute chuan Bangkok huamchhunga mipui hri kai tamna hmuna awm te chu mahni in lama hna thawk tur te, hri kai tam zualna province10 -ah checkpoint 145 siam tur leh, ṭul bik thil ni loah zin chhuak lo turin an ngen.

Ramchhunga hri kai thar leh thihpui an pun chak avangin kar hnih awh tur khuahkhirhna hi siam a ni a, hemi chhung hian mall khar a ni ang a, mi panga aia tam punkhawm khapin zanlam curfew puan a ni bawk ang. Transport company-te chuan kaihhruaina dan thar hi zawm nghalin, chhunah Bangkok leh a chhehvela public transport service pawh tihtlem a ni.

Report tihchhuah tharah nimin khan Thailand-ah hri kai thar 8,656 awm belh lehin, mi 80 in an thihpui. Hri kai hmuhchhuah tawh 3,45,027 leh hri vanga thi 2,791 an awm tawh a ni. Hri kai thar zinga a tam zawk te chu April thla tir aṭanga Alpha leh Delta Covid-19 variant darh vanga kai te an ni.

Thai AirAsia chuan July 31 thleng domestic flight zawng zawng a chawlhtir a, Bangkok Airways (BA.BK) leh Thai Airways (THAI.BK) subsidiary Thai Smile pawhin domestic flight tihtlem an tum tih an sawi bawk.