Mandalay Court-ah Suu Kyi-i thubuai dang siamsak leh

Myanmar sipaiten civil hruaitu an paihthlak tak leh an hren mek, Aung San Suu Kyi-i chu Mandalay court-ah thubuai pali siamsak belh leh a ni tih a lawyer chuan a sawi.

Suu Kyi-i lawyer, Min Min Soe chuan thubuai an siamsak chungchang hi kimchang taka an la hriat bik loh thu sawiin, eirua puhna erawh a tel a, heng thubuaite hi eng vanga siamsak nge an ni tih an la hre thei lo tih a sawi.

Kumin February 1-a sipaiten civil sorkar thuneihna an hnehchhuh hnu khan Suu Kyi pawh hi an hreng zui nghal a, thubuai eng emaw zat siamsak a ni tawh. Mandalay Court-a thubuai siamsak a nih hma hian an ram khawpui, Nay Pyi Taw court leh Yangon court-ah pawh thubuai hi siamsak a lo ni tawh a ni.

Kum 76 mi, Suu Kyi-i thubuai neih zingah hian phalna nei loa ram pawn aṭanga walkie talkie lalut leh kawla puhna te, coronavirus protocol bawhchhiaa puhna te, thamna laa puhna te bakah Official Secrets Act bawhchhiaa puhnate pawh a tel. Official Secrets Act bawhchhiaa puhna bikah hian thiam loh chantir a nih chuan kum 14 thleng jail tantir theih a ni ang.

Hetihlai hian Suu Kyi-i legal team lam chuan an puhna hrang hrangte hi thil dik lo vek niin an sawi thung.

Thawhṭanni khan sipai sorkar thupuangtu, Zaw Min Tun chuan press conference a nei a, mahse hetah hian Suu Kyi-i thubuai siam thar sak a nih chungchangah hi a sawi lang lo. Zaw Min Tun chuan an rama civil sorkarin Suu Kyi chanvo tura Counsellor post a siam kha ram danpui kalh a ni, a ti. Hei hi thubuai an siam thar sak zingah a tel em tih erawh hriat chian a ni lo.

Myanmar sipai sorkar hmasak hun laia siam, an ram danpui hnuaiah hian ram dang mi nupui/pasala nei a, fa neite chu President-ah dah khap an ni. Hei vang hian Suu Kyi-i hi an party, National League for Demcoracy (NLD) in sorkarna an siam khan President-ah dah theih a ni lo a, post thar Counsellor post hi a chan turin an siam chawp a ni.