SAfrica-a tualchhung buaina chhuakah mi paruk an thi

South Africa president hlui, Jacob Zuma man a nih avanga tualchhung buaina chhuakah mi paruk an thi tawh a, mi 219 man an ni tawh bawk tih police-te chuan an sawi.

Jacob Zuma thlawptute hian hmun hrang hrangah President hlui man a nih avanga lungawi loin buaina an siam a, venhimna hna thawk turin sipaite tirh an ni tih National Defence Force chuan a sawi.

Police-te chuan dawr leh sumdawnna hmun eng emaw zat chu mipui lungawi lote hian rawkin an suasam tih sawiin, kawngpuiah motor ke halin traffic an ti buai a, car-te pawh an bei tel bawk tih an sawi a ni.

Jacob Zuma hi President a nih lai, kum 2009-2018 chhunga eirukna thleng chungchang chhuinaah thu zawhfiah tura court-in a kohna a zawm duh loh avangin, court thupek zah loah puhin kar liam ta khan man a ni a, thla 15 chhung tang tura tih a ni.

Thawhṭanni khan Zuma chuan thla 15 tang tura hremna pek hi court-ah a khing let a, an ngaihtuah hun tur erawh tihchian a la ni lo.