Iraq-a Covid-19 hospital-ah kangmei a chhuak

Iraq chhim lam, Dhi Qar biala Nassiriya khuaa Covid-19 hospital-ah Thawhṭanni zan khan oxygen tank puak vangin kangmei a chhuak a, mi 52 an thi.

Hri kaite enkawlna hmuna chhiatna thleng vang hian prime minister Mustafa al-Kadhimi chuan senior minister-te chu emergency meeting a neihpui nghal a, Nassirirya khuaa health leh civil defence manager-te chu ban tur leh, man nghal turin an ti. Hospital manager pawh ban a ni nghal bawk.

Kangmei chhuahna hmun hi Al-Hussein hospital a ni a, Covid isolation ward chu a kang chhe vek nia sawi a ni. Nimin zing khan ruang 52 hmuh a ni tawh a, chin hriat lohin mi eng emaw zat an la awm bawk. Ward-ah hian khum 70 a awm a, thla thum liam taa sak zawh chauh kha a ni.

Dhi Qar health directorate chuan thi zingah hian medical staff member pahnih leh hospital security guard a tel tih a tarlang. Dam lo chin hriat loa awm an la awm avangin thi zat pawh hi an la pun chhoh a rinawm thu a tarlang bawk.

Kumin April thla khan Baghdad-a Covid-19 hospital-ah oxygen cylinder puak vangin kangmei a lo chhuak tawh bawk a, mi 80 thiin mi dang 110 in hliam an tuar a ni. He thil thleng vang hian health minister Hassan al-Tamimi chuan banna a thehluh phah a ni.