Ram pawn lam ṭanga Puigdemont-a ro rel remti lo

Spanish court chuan Spain aṭanga Catalonia inlakhran thlawptu, Carles Puigdemont chu Catalonia bial president dinhmun a chelh leh a remti lo.

Carles Puigdemont hian nikum October thla khan Catalonia indepen­dence a puang a, hei vang hian Spain sorkar chuan Catalonia regional sorkar chu a ṭhiat nghal a ni. Hemi hnu hian Puigdemont hi Belgium ramah a tlanchhia a, a awm loh chungin sorkar laka hel leh midangte fuihpawrhah puhin thubuai siamsak a ni zui a ni.

Nikum December thla khan Spain sorkar chuan Catalonia bialah inthlan ṭhat a buatsaih a, mahse inthlanah hian inlakhran duhtu pawl pahnih ṭangdunte chuan Catalan parliament-ah majority an la chang pha a ni.

Catalan president thar tur hi naktuk hian thlan a ni dawn a, majority changtu ṭangrual pawlte chuan Puidgemont hi president candidate atan an ruat a, chuhtu dang an awm lo. Mahse Spain sorkar chuan ramdanga tlanchhe mekin regional parliament a kaihruai thei lo tih a sawi a, court chuan Puigdemont hi Parliament-ah hian amah ngei a inlan loh chuan lakluh theih a ni lo tih a sawi bawk. Hetihlai hian Puigdemont-a thlawptu lam chuan Belgium aṭangin video link leh technology dang hmangin a hna hi a thawk thei dawn tho niin an sawi thung.