Firfiakten Kabul-a military academy bei

Afghanistan khawpui, Kabul-a military academy chu nimin zing khan firfiakten an bei a, sipai panga an thi a, midang 10 in hliam an tuar. Academy beitu firfiak pali an thi bawk a, pakhat erawh chu scurity force-ten an man a ni.

Defence ministry thupuangtu, Dawlat Waziri chuan zing dar 5 velah firfiakte hian Marshal Fahim National Defense University hi an bei niin a sawi. An zinga pakhat chuan gate bulah thihchilh bomb a tipuak a, midangte chuan compound chhunga luh hi an tum a, security force-te nen an inkap zui a ni. Pawikhawitute hian silai bakah Rocket Propelled Grenades (RPGs) an hmang tel a ni.

Marshal Fahim National Defense University hi Kabul khawthlang lam, District 5-a Charrah-i-Qambar a awm a ni. He hmun hi high-ranking officer-te training na hmun a ni. University chhungah hian military academy pawimawh tak tak pathum–National Military Academy of Afghanistan (NMAA), Afghan National Army Officer Academy (ANAOA) leh Non-Commissioned Officer (NCO) Academy-te an awm.

Firfiak leh sipaite hi zing dar 7.30 vel thleng an inkap zui a, firfiak zinga pahnih chu an bomb pai an tihpuahnaah an thi a, pahnih chu security force-ten kaphlumin pakhat man a ni bawk. Firfiakte hian academy building bula sipai officer-te chenna in awm ho pawh an kap nasa hle a ni.

Mi maktaduai 5 ve chenna, Kabul khawpuiah hian firfiakte an che hluar hle a, inhnaih te tein pawikhawihna lian tham tak ṭum thum a thleng a ni. Inrinni khan ambulance-ah bomb tihpuah vangin mi 103 an thi a, hemi hma lawk hian international hotel beih niin mi 22 an thi bawk.