Russia eptu hruaitu man

Russia eptu hruaitu Alexei Navalny chu Pathianni khan Moscow-ah nawrh huaihawtnaah police-ten an man a, mahse reilote hnuah chhuah leh nghal a ni.

Pathianni khan Moscow-ah Navalny kaihhruai hian eptute chuan kumin March thlaa an ram president thlanna neih tur duh lohna lantirin nawrh an huaihawt a ni. Nawrh huaihawtna hmuna police-te chuan kum 41 mi, Navalny hi manin bus-in an hruai hrang nghal a ni. Thuneitute chuan Navalny hi phalna nei loa nawrh huaihawta puhin thubuai siamsak a ni dawn tih an sawi. Mahse Pathianni zan khan Navalny hi chhuah leh nghal a ni.

Moscow-a rally huaihawtah hian mi 4,000 vel an pungkhawm a, pung-khawmte chuan inthlan buatsaih tum chu President Vladimir Putin-ten a term a pawhseina tum hmanrua mai nia sawiin, a chak tur chiang sa a nih vangin inthlan tak tak pawh a ni lo tiin an sawi. An ram inrelbawl dan chu thlak danglam an duh thu an sawi.

Navalny hi Putin-a khing thei ber tura ngaih a ni a, mahse nikum khan thuneitute phalna loa nawrh huaihawta puh a nih avangin ṭum thum, ni 15, 25 leh ni 20 chhungin jail-ah dah a lo ni tawh a ni. Navalny hian president thlanna neih turah hian chuh a tum thu a lo sawi tawh a, mahse thuneitute pawikhawihna thilah thiam loh chantir a nih tawh avangin a chuh thei lo niin an sawi. Navalny chuan hei hi politics lama an beihna niin a sawi thung.

Navalny chuan president chuh thei loa dan a nih avangin, inthlanah hian vote thlak lo tura mipuite fuihin a bei zel dawn tih a sawi.